Agtultuloy latta a banbantayan dagiti bombero ti tallo a dadakkel a wildfire idiay Lahaina, Poleho a dumanon idiay Kile ken Kula no sadino nasurok 1000 acre ti agtultuloy a maur-uram idiay Maui, Hawaii.
Iti pannakiuman ti Bombo Radyo La Union kenni Bombo International News Correspondent Paul John Marcos Castillo, native ti Bacnotan, La Union, kinuna na a 55 dagiti pimmusay.
Segun pay kenni Castillo dumanon ti 270 ti bilang dagiti nadadael nga istruktura gapu iti nalawa a wildfire.
Kabayatan na, dagiti aktibo a wildfire idiay Lahaina ket 8% ti contained, 70% contained idiay Poleho bayat nga awan idiay Kula segun kadagiti bombero a tumultulong iti panangsebseb iti uram.
Mainaeg iti daytoy, agtultuloy latta iti ar-aramiden a panag-evacuate kadagiti turista, residente ken bisita tapno makaruar iti West Maui. Gapu pay laeng iti wildfire ket 12,400 ti saan pay a maka connect iti internet.
Agtaltalinaed met iti shelter ti 1,350 a tattao bayat a 1,400 ti naturog iti Kahuloy Airport.
Innayon pay ni Castillo nga idi napalabas nga aldaw ti Miyerkules ket dumanonen iti 14,000 dagiti immakar idiay Maui ket manamnama a dumanon ti 14,500 dagiti indibidual ti makasubli idiay O’ahu wenno iti lugar a naggapuan dagitoy manipud idiay Maui.
