LA UNION – Uppat a tattao iti nagpasar ti pannakadun-dunor iti bagi kalpasan a nagdinnungpar iti traysikel ken motorsiklo, iti kawatiwatan ti kalsada a sakop ti Barangay Catbangen, San Fernando City, La Union.
Dagiti karaman iti aksidente ket iti traysikel a minaneho ni Henry Hufana, 47, residente ti Barangay Santiago Norte ken motorcycle a minaneho ni Eric Millares, 49, residente ti Barangay Catbangen ditoy syudad.
Maibasar iti report, iti traysikel ket agtur-turong iti abagatan a direksiyon bayat a ti motorsiklo ket agpa-amianan, idi kellaat a nag-u-turn ti naud-udi, a makagapo iti panagdinnungpar iti dua a behikulo.
Kas resulta, nagsagaba ti nakaru a pannakadun-dunor iti motorcycle rider ken dagiti tallo a pasaheros ti traysikel nga isuda Myrna Reyes, 18; Maureen Asuncion, 22; ken Robelyn Estrada, 21.
Saan met a nasugatan iti tricycle driver ngem natakwatan a positibo iti mainom a makabartek ti motorcycle rider.
Kabayatanna, nadun-dunor met iti dua a tattao kalpasan iti karambola dagiti tallo a behikulo iti kawatiwatan ti national highway a sakop ti Barangay Ribsuan, Naguilian, La Union.
Dagiti karaman iti aksidente ket pakaibilangan ti maysa a kotse, addaan ti plate number AAX 1650, minaneho ni Ericson Venturina, 27, baro, maysa a sales manager, ken residente ti Dominican Hill Baguio City; maysa a van, with plate # UIC 730, minaneho ni Eduardo Onorio Sr., 45, residente ti Barangay Lingsat, San Fernando City, La Union; ken maysa a Fariñas bus, AAN 2529, minaneho ni Norben Inosente, 43, tubo ti Paoay, Ilocos Norte.
Maibasar iti report, dagiti tallo a behikulo ket agpapada nga agturong iti daya a direksiyon idi kellaat a nadungpar ti van iti sar-sarunwen na a bus, ken nakadungparan met daytoy iti sar-sarunwen na a kotse.
Kas resulta, dua nga occupants ti van iti nadun-dunor ken dagus a naiturong iti Naguilian District Hospital tapno maagasan.
