LA UNION – Ad-adu itan kadagiti overseas Filipino workers ti lumikliklik iti naduma-duma a lugar idiay Israel gapu iti butengda a kemmegen dagiti immigration officers iti nasao a pagilian.
Daytoy ket kalpasan a naarestar idi napan a lawas ti innem a Pilipino nga ita ket iggem pay laeng dagiti otoridad gapu iti kinaaan ti working visa bayat a nagpaso metten ti pasaporteda.
Segun ken ni Monina Avraham nga adda idiay Tel Aviv, agarup amin a lugar sadiay, nangruna idiay Takana Markazit, ket sipsiputan dagiti immigration officer a nakasibilyan tapno rikisaenda ti visa ken pasaporte dagiti foreign workers gapu iti naingetan a “no visa, no work” policy ti pagilian.
Uray dagiti mall ket serserken metten dagitoy ken sitsitaenda dagiti mangmangged a ganggannaet.
Gapu iti daytoy, kinuna ni Avraham a kaaduan kadagiti kailian idiay Israel ket pilienda ti agtalinaed laengen iti uneg ti balay gapu ta malaksid iti terror attack, ket mabutengda met a maibalud.
