LA UNION – Sumangsango ti kaso a panaglabsing iti P.D. 1602, in relation to R.A. 11332 ken Article 151 dagiti innem nga indibiduwal a natiliwan nga agsusugal iti maaw-awagan a ‘pusoy dos’ idiay Bangar, La Union.
Daytoy iti kinumpirma ni P/Maj Marlon Padamada, officer-in-charge idiay Bangar Police Station, kalpasan iti insayangkat dagitoy nga anti illegal gambling operation, a nagresulta iti pannakatiliw dagiti nasao nga indibiduwal a pakairamanan iti 5 a babbae ken maysa a miyembro ti LGBT community idiay Brgy. Rissing ili ti Bangar.
Kinumpiskar dagiti otoridad iti maysa a set ti baraha ken iti 100 pesos a bet money.
Iti pannakiuman ti Bombo Radyo La Union kenni Maj. Padamada, inaklon na a sumagmamano kadagiti natiliw ket miyembro ti 4Ps .
Mainaig ti daytoy, naminsan pay a nagpalagip ti pulisiya kadagiti umili a makikooperar dagitoy ken sumurot kadagiti pagallagadan tapno mamantiner a covid free ti ili a Bangar, La Union.
