LA UNION – Temporaryo nga impawil iti lokal a gobyerno iti panagturong dagiti turista kadagiti innem nga agkakapintas a disso-or wenno water falls a masarakan idiay ili ti Bagulin, La Union.
Base iti naipasa a resolusyon iti konseho ti Bagulin,manipud ita a bulan ti Agusto agingga Oktubre ket saan a mapalubusan dagiti ganganaet wenno residente nga agturong kadagiti water falls gapu iti peggad a mabalin a mapasaran dagiti agpasyar.
Panggep iti temporaryo a panangipaserra a makaliklik iti aniaman a kita iti aksidente kas iti pannakalmes wenno pannakaigalis kadagiti nangangato a dalan gapu iti kanayon a panagtudtudo ken iti kinapigsa ti ayus ti danum.
Kabayatanna, imbilin metten ni Bagulin Municipal Mayor Virgilio Flor iti pulisya ken kadagiti opisyal ti barangay a seguraduhin nga awan iti aniaman a mapasamak nga aktibidad kadagiti water falls.
