Sinuportaran ni Senate Pro Tempore Panfilo “Ping” Lacson ti singasing a joint oil and gas exploration iti nagbaetan ti Pilipinas ken China, nangruna idiay West Philippine Sea, iti baet ti pangta iti global oil supply gapu iti tension idiay Middle East.
Segun kenni Lacson, rumbeng nga adalen ti administrasion ni Presidente Ferdinand Marcos Jr. iti nasao nga addang, gapu ta adda potensialna a mangipaay ti dakkel a kita ken makatulong iti seguridad ti enerhia ti pagilian.
Nupay kasta, impaganetgetna a nasken a tungpalen iti aniaman a katulagan ti 60-40 foreign ownership rule a nakalanad ti 1987 Constitution, a no saan nga bumaba ti 60% ket masapul a kukua dagiti Pilipino.
Innayon ti senador a nupay nabaknang ti West Philippine Sea iti lana ken natural gas, awan ti teknikal ken pinansial a kabaelan ti Pilipinas a mangbukod a mangisayangkat ti eksplorasion. Iti sabali a bangir, maipagarup nga adda iti China ti kasapulan a teknolohia para iti daytoy.
Innayonna a no umanamong ti China iti 60-40 a panagbingay, pakakitaan daytoy ti panangbigbig iti soberanya ti Pilipinas iti nasao a kabaybayan.
Linagip pay ni Lacson a kabayatan ti administrasion ni Rodrigo Duterte, daytoy a gannuat ket napagsaritaan kadua ti agdama a Senate President Vicente Sotto III ken sigud a Senador Gregorio Honasan, ken makunkuna a nagbalin a silulukat ti sigud a Presidente iti daytoy.###
