Dimmanonen ti 66 iti bilang dagiti pimmusay gapu iti panagsuwek ti eroplano ti Colombian Air Force, segun kadagiti opisial, bayat a maal-ala pay laeng dagiti bangkay manipud iti nakapasamakan ti aksidente.
Napasamak ti insidente bayat ti panagtayab ti Hercules C-130 transport plane nga aramid ti Lockheed Martin manipud Puerto Leguizamo, asideg iti beddeng ti Peru, segun kenni Pedro Sanchez.
Maibasar iti inisial nga imbestigasion, maipagarup a naaddaan ti impact iti murdong ti runway ken timmama ti payak iti kayo bayat ti panagsuwekna, a nakaigapuan ti uram ken panagbettak ti sumagmamano a nakalugan nga alikamen.
Immuna a nagresponde dagiti residente iti lugar ket insalakanda dagiti sumagmamano a nasugatan, sakbay a simmangpet dagiti lugan ti militar. Narigatan met dagiti rescue team a mangdanon iti crash site.
Segun iti report, adda ti 121 a tattao a naglugan iti eroplano, pakairamanan dagiti 110 a soldado ken 11 a tripulante, nupay saan pay a nalawag ti nagdumaan ti bilang dagiti natay nga impadamag dagiti lokal nga otoridad.###
