Dumanon iti pito a balay ti nadadael gapu iti uram idiay Purok 2, Barangay Rimos 3, Luna, La Union agarup alas 7:00 ita a rabii, Agosto 21, 2023.
Iti pannakiuman ti Bombo Radyo La Union News Team iti Barangay Kagawad Tante Autriz, lima a babbalay ti naan-anay a nadadael idinto a dua ti partially damaged.
Segun ken ni Kagawad Austriz, nangrugi ti uram iti balay ti maysa a Marlon Villanueva gapu iti nadadael a circuit breaker na, agingga a napardas a nagkayamkam ti uram iti innem pay a balbalay a kaarruba na met laeng.
Kinunana a dagiti nauram a balay ket naaramid iti semi concrete ken asideg iti squatter area.
Kabayatanna, adda itan dagiti nauraman a pamiliya iti evacuation area sadiay Barangay Rimos 3.
Saan pay nga ammo ti bilang dagiti nauraman a pamilia ken ti danyos ti nadadael.
Awan ti naipadamag a nasugatan nga umili iti nasao nga insidente.
