LA UNION – Nakailista iti baro a pito a kaso ti COVID 19 iti probinsiya ti La Union, kas pinatalgedan ti DOH, PHO, ken CHO.
Nakailanad iti official statement ti Provincial Gov’t. of La Union (PGLU) ken iti City Gov’t. of San Fernando, nga innem manipud kadagiti pito a kaso ket nailista ditoy syudad ti San Fernando bayat a ti maysa a kaso ket nailista idiay ili ti Caba, La Union.
Gaputi dayta, iti ili a Caba mangrugi inton bigat, July 21, ket maipasidong iti Enhanced Community Quarantine (ECQ) agingga July 25, 2020.
Daytoy ket kalpasan nga aprubaran a dagus ti Regional Inter-Agency Task Force for Covid-19 (RIATF) iti kadawatan ti PGLU, babaen ti Executive Order No. 23 series of 2020.
Kabayatanna, ireb-rebyu pay laeng ti RIATF iti kadawatan ni City Mayor Alf Ortega nga ipasidong met iti ECQ iti syudad.
Kayatna sawen, saan pay nga inaprubaran ti RIATF iti nasao a request ken maur-uray pay laeng iti resulta daytoy.
Kadagiti pito a baro a kaso ti COVID 19 a nailista ditoy probinsiya, innem ket nagtaud ditoy San Fernando City ken maysa iti nailista a natay.
Dua a barangay ditoy syudad, iti Barangay San Agustin ken Barangay Tanqui ket nakapasidong iti Heightened Community Quarantine (HCQ) until further notice.
Nupay kasta, amin nga opisina ti gobyerno kadagiti HCQ areas ket agtultuloy iti operasyon na.
Iti La Union, base iti case bulletin ng COVID 19, ket addaan itan ti 57 total number of confirmed case, 31 dagiti aktibo a kaso, agtaltalinaed a 19 iti recoveries ken pito iti natay iti COVID disease kabilang iti maysa a baro a natay ditoy syudad ti San Fernando.
