LA UNION – Im-imbestigaran ita dagiti otoridad ti napasamak a panangatake ken panangkagat iti narungsot nga aso a nakatayan iti pito a kalding idiay Barangay Sevill, syudad ti San Fernando, La Union.
Iti pannakiuman ti Bombo Radyo kenni Cristadel Flores nga immuna a nakadiskobre ti insidente, kinunana a nasangpetanna a nakadasay ken dara-dara dagiti taraken a kalding iti kabagyanna.
Sigun kenni Flores, adu iti kagat ti bagi, nawak-wakan iti bbuksit dagiti kalding ken awan iti dadduma a parte ti lalaem dagitoy.
Dakkel iti atap dagiti makintaraken a narungsot nga aso iti nangkagat kadagiti kaldingda base kadagiti pangilasinan iti sugat a naduktalanda.
Kabayatanna, gandaten met a duktalen iti barangay council ti posible nga agsungbat iti pannakatay kadagiti nasao a taraken.
Kinuna ni Sevilla Punong Barangay Rudy Milanes, mangisayangkatda met iti imbestigasyon tapno ammuen ti makin-aso a maipagarup a nangpatay kadagiti kalding.
