LA UNION – Mangisaysayangkat iti imbestigasyon ti pulisya maipapan kadagiti pito a lallaki a nagpabigbig a pulis a nangisayang iti raid iti uneg ti maysa a balay idiay Barangay Loren, ili ti Tubao, La Union.
Naammuan ti Bombo Radyo manipud iti Tubao Police Station, nagkamang iti opisinada ti biktima a ni Josefina Esguera tapno ireklamo ti nagpabigbig nga SPO3 Cagayan ken ti dadduma pay kakaddua daytoy a nangalikad iti balayna.
Base iti salaysay ni Esguera, rimmaot dagiti nagpabigbig a kameng ti Criminal Investigation and Detection Group (CIDG) La Union gapu ta adda dagiti sapsapulenda a dua a pugante nga aglemlemeng iti balayna.
Maipagarup a nangiruar met iti search warrant dagiti nagpabigbig a pulis kasaruno iti panangalikad ti uneg iti balay daytoy.
Nakompiskar manipud iti uneg ti balay ni Esguera ti maysa nga air gun, shot gun, cal .9mm pistol, ken ti naduma-duma a kita iti bala.
Kalpasan a nagpirma iti dokumento ti misis maipapan kadagiti nakompiskar nga arams ken imbati met laeng dagiti dagiti maipagarup a pulis kasaruno iti panangitarayda iti maysa a tarakenna a kalding ken P3,00o a kwarta.
Naglugan dagiti nagpabigbig a tauhan ti CIDG iti maysa a Toyota Innova nga immadayo iti nasao a lugar.
Iti agdama, makikikoordinar ti Tubao Police iti CIDG-La Union tapno iberipika ti reklamo iti nasao a misis.
