LA UNION – Ur-urayen iti pulisya iti pangeddeng dagiti biktima iti napasamak a panagdinungpar ti kotse ken van iti kawatiwatan ti national highway idiay Barangay Pagdaraoan, syudad ti San Fernando, La Union.
Naammuan ti Bombo Radyo manipud iti San Fernando City Police, adda iti sidong ti agsinnumbangir a benneg ti pagbanagan ti kaso iti nadakamat nga aksidente a nakasugatan iti pito a tattao.
Immuna iti daytoy, base ti imbestigasyon iti pulisya ket maipagarup nga immagaw iti linya ti nagmaneho iti kotse a ni Christian Dominic Calderon, 38, residente ti San Juan, La Union iti kasinnabatna a van a manmanehuen ni Jessie Afos, 36, residente iti ili ti Luna, La Union isu a napasamak ti aksidente.
Naiturong iti ospital ni Afos kaddua dagiti innem manipud iti pito a pasahero daytoy a naglak-am iti sugat ti bagi.
Nagasat met Calderon ken ti maysa a pasahero ti van gapu ta maipagarup a saan a nagarungyadan dagitoy.
Maipagarup nga adda iti impluwensya ti makabartek nga inumen ti driver iti kotse idi a mapasamak ti aksidente.
