LA UNION – Bangkayen idi masarakan ti maysa a 70-anyos a lolo iti kabakiran a paset ti Sitio Payas, Brgy. Lettac Norte idiay ili ti Santol, La Union.
Nabigbig ti pimmusay a ni Constantino Bautista, residente iti nasao a pagilian.
Segun kadagiti otoridad, nagturong ti lakay iti maysa a malem iti kabakiran tapno agkayo ngem saanen a nagawid pay.
Nupay kasta, idi sinapul dagiti kabagianda ket nakitada laengen a maysan daytoy a bangkay.
Sakbay ti insidente, inaklon dagiti kabagian ni Bautista nga agsagsagaba daytoy iti epilepsy wenno panagkissiw.
