LA UNION – Masayangan dagiti mannalon ken iti lokal a gobyerno kadagiti nadadael a kapagayan idiay ili ti San Juan, La Union gapu iti panagduprak iti bagyo Ompong.
Iti pannakiuman ti Bombo Radyo kenni San Juan Municipal Mayor Arthuro Valdriz, kinunana a base iti patta-patta ti municipal agriculture office ket umabuten iti 70 percent a kapagayan a mabalinen nga apiten ti saanen a mapagnumaran dagiti mannalon.
Impanamnama met ni Mayor Valdriz iti tulong nga agtaod iti lokal a gobyerno ti San Juan para kadagiti nadakamat a mannalon tapno makasubbot dagitoy manipud iti pannakaappog.
Kabayatanna, umabuten iti 1,110 a tattao ti naiyakar manipud kadagiti naduma-duma a barangay ti nasao nga ili ken temporaryo nga agnanaed kadagiti evacuation centers.
Naikkan metten kinunana iti taraon, kawes ken alikamen a pangturog dagiti evacuees.
