LA UNION – Agtultuloy iti isay-sayangkat a vaccine rollout ti DOH-Center for Health Development 1, kadagiti referral hospitals iti sapasap a rehiyon uno.
Iti kauddian a report nga indanon iti Bombo Radyo La Union ni DOH Region 1 Medical Officer 4 Dr. Rhuel Bobis, umaboten iti 2,416 healthcare workers iti nabakunaan ti Sinovac vaccine wenno kaibatugan iti 34.4% target completion.
Ditoy probinsiya ti La Union, addan iti pakabuklan a 786 healthcare workers iti nabakunaan manipud iti first batch ti Sinovac vaccines, a pakaibilangan iti 586 frontliners manipud ITRMC ken 200 manipud La Union Medical Center idiay Agoo, La Union.
Segun kenni Dr. Bobis, adda iti pito a nabakunaan iti nakapadas ti minor side effects kas koma iti panaglabbaga ti rupa, panaggagatel iti paset a natudukan ti bakuna, ken pannakaulaw, ngem dagus a naipaayan dagitoy ti pannakataming.
Maipalagip a pakabuklan a 14, 400 Sinovac vaccines ken 10,000 doses ti AstraZeneca iti immuna a simmangpet ken naiyalokar para kadagiti healthcare workers iti intero a rehion uno.
