LA UNION – Agtultuloy ti panangipaay iti family food packs ti DSWD Region 1 kadagiti pamilya nga apektado iti maipatpatungpal a lockdown gapwanan ti COVID-19, iti naduma-duma a lugar iti Ilocos Region.
Iti interview ti Bombo Radyo La Union kenni DSWD Region 1 Communication officer Iryn Cubangbang, iti ipapaay da a family food packs ket agserbi laeng nga augmentation wenno pangnayon iti tulong nga ibum-bunong dagiti lokal a gobyerno kadagiti pamilya manipud kadagiti purok wenno sitio iti barangay a nakapasidong iti lockdown.
Sipud idi bulan ti Hulyo agingga Agosto, nakaipaayen ti DSWD Region 1 iti pakabuklan nga 8,817,771 family food packs para kadagiti apektado a pamilya.
Manipud iti nasao a bilang, nasurok 6 a milyon a food packs iti naibunong idiay Ilocos Norte; Ilocos Sur – 211,283; La Union – 17,680; ken idiay probinsiya ti Pangasinan ket 1,894,593 family food packs.
Innayon pay iti nadakamat nga opisyal a silulukat ti DSWD kadagiti LGUs nga agkiddaw ti tulong, nupay adda iti kabaelan kunana dagiti LGU nga ipaayan ti ayuda dagiti naka-lockdown a pamilya kadagiti barangay.
