LA UNION – Agtultuloy pay laeng a sapsapulen ti Bagulin Police Station ken dadduma pay a rescue groups ti maysa a grade two pupil kalpasan a naigalis ken nalmes iti waig bayat nga agawid koman manipud iti pagadalan idi malem-kalman.
Nabigbig ti ubing a ni Rainier Arellano, 8-anyos, residente ti Brgy. Dagup.
Maibasar iti impormasion manipud iti pulisia, naamuan a kadua ni Arellano ti dua pay a kaadalanna a nagna iti pay-as ngem naigalis daytoy gapu iti kinapigsa ti tudo.
Napaspas met a nayanud ti napegges a danum ti ubing agingga a saanen daytoy a makita dagiti kakaduana.
Dagus a nagpaarayat dagiti kaklase ni Rainier kadagiti otoridad a daras a nangisayangkat iti search operation.
