LA UNION – Inarestar dagiti otoridad Iti walo a mangngalap iti nagsina nga anti-ilegal fishing operation idiay ili ti Rosario, La Union itattay parbangon.
Maibasar iti impormasyon a nakalap ti Bombo Radyo manipud iti Rosario Police Station, nakemmeg idiay Barangay Bani dagiti uppat a mangngalap ken nakompiskar manipud iti ikotda iti 40 kilos ti lames nga addaan ti market value a P3,200, fine mesh net, ken ti inaramatda a bilog.
Kabayatanna, arestado iti sabali pay nga operasyon idiay Barangay Rabon dagiti uppay a mangngalap ken nakompiskar met manipud iti salwadda ti 50 kilos a lames.
Agpapada a napilaan ti panaglabsing ti municipal ordinance dagiti walo gapu iti panagkalap dagitoy iti kabaybayan a masakupan ti nasao nga ili nga awanan ti permit.
