LA UNION – Pudno nga awan ti pil-pilyen nga edad iti panagadal.
Daytoy ket napaneknekan kalpasan a maysa nga 82-anyos a lola manipud Bangar, La Union iti nagturpos ti Junior High School babaen ti Alternative Learning System (ALS).
Ni Nanay Rosita Monis ket maysa itan a Junior High Completer ken nagturpos nga addaan ti ADAL Awardee iti Alternative Learning System – Bangar District.
Iti pannakiuman ti Bombo Radyo La Union kenni Nanay Rosita, impeksa na ti napalaos a panagyamanna kadagiti timmulong tapno isuna ket makaturpos, kangrunaanna kenni Doctor of Education, Evelyn Jaramilla , a nang-allukoy kenkuana tapno ituloy na iti agiskwela.
Makatawen a nagadal ni Nanay Rosita idiay ALS manipud Abril 2023 agingga Abril 2024.
Segun kenni Nanay Rosita, naimbag ken adu iti nasursuro na kenni Teacher Evelyn.
Kinunana a saan na malipatan dagitoy a naad-adal na agsipudta adda dagiti banag nga saan-na naadal idi ubing pay, ket dagitoy a nasursuro na ti mabalin na nga ipatawid kadagiti appo na.
Iti agdama ket aglaklako ni Nanay Rosita iti nat-nateng, iti laksid nga adda dagiti pinansyal a suporta a mait-ited kenkuana.
Maragsakan met dagiti walo nga anak ni Nanay Rosita ti nagun-od iti edukasyon babaen ti programa ti Department of Education.
Kabayatanna, rinaem ni Dr. Jaramilla iti kinaregget ken kina-anus ni Nanay Rosita tapno makasuro iti sidong ti programa nga ALS.
Kagiddan daytoy iti panangallokoy na kadagiti amin a saan pay a nagturpos ti elementarya ken hayskul, nga ituloy ti agadal agsipudta sabali latta nu adda iti ig-iggaman nga armas wenno diploma.
