LA UNION – Nagkamangen iti gobyerno dagiti siyan a tagasuporta ti New People’s Army idiay ili ti Maria, Aurora.
Iti pannakiuman ti Bombo Radyo kenni LtCoL. Reandrew Rubio, acting commanding officer ti 91IB, 7ID, PA, kinunana a nagtaod manipud iti grupo nga agpapaay kas legal front ti NPA a Panglalawigang Alyansa ng Magsasaka sa Aurora (PAMA) dagiti saanen a nainaganan a limmaksid iti bunggoy.
Sigun kenni Rubio, gapu iti saan a panagtungpal ti kari dagiti rebelde kadagiti simmuko a mannalon ken ti agtultuloy a pannakisarita iti lokal a gobyerno kadagitoy ti makagapu iti panangwaswasda ti suporta.
Maipagarup a karaman ti PAMA kadagiti agkalkalap iti tulong para ti NPA.
Kabayatanna, naipaayan metten iti relief goods dagiti simuko ken malaksid pay iti dadduma nga ayuda nga ited ti gobyerno kadakuada.
