LA UNION – Mabalinen ita a tawagan ti 911 emergency hotline ditoy probinsya ti La Union.
Daytoy iti kinumpirma ni La Union Provincial Disaster Risk Reduction and Management Officer Bobby Valdriz.
Iti pannakiuman ti Bombo Radyo iti nadakamat nga opisyal, kinunana a sakupen ti nasao nga hotline ti intero a probinsya.
Aniaman a pasamak iti naduma-duma a lugar ditoy La Union kangrunaan no adda ti emergency kas ti kalamidad, aksidente iti kalsada wenno krimen ket mabalinen nga itawag iti 911.
Dagus met a sumungbat dagiti tauhan a mangimatmaton iti komunikasyon ken ipakaammoda daytoy kadagiti masenan nga opisina tapno agresponde wenno umarayat.
Sigun ti opisyal, gapu ta centralized itan ti communication system ket mas naparpartak iti panagresponden dagiti otoridad.
Ti 911 emergency hotline ditoy La Union ket imatmatunan ti La Union Provincial Disaster Risk Reduction and Management Office a nakabase idiay kapitolyo ti La Union.
Libre wenno free of charge iti panagtawag ti emergency hotline no agaramat ti telepono wenno landline, ngem addaan met ti charged wenno bayad a P5.50 ara kadagiti agaramat ti cellular phones.
Umap-apela met ti gobyerno-probinsya nga aramaten iti importante a gundaway ti 911 emergency hotline ken saan a mangaramid ti prank calls wenno aramiden nga angaw iti panagtawag ditoy.
Kabayatnna, ad-adalen met ti national government nga aramiden a libre iti panagtawag ti emergency hotline. (Abs Flores)
