LA UNION – Nasarakan met laeng idi kalman, agarop alas 10:00 ti bigat, iti maysa a 64-anyos a nataengan nga immunan a nai-report a mapukpukaw idi Domingo, Agosto 5 idiay San Juan, La Union.
Sakbay a kimmiddaw iti police assistance ti pamilya ti biktima a ni Carmelita Lionin, addaan asawa, residente ti Barangay Nagsaag ti nasao met laeng nga ili ket nakita da iti tsinelas ken bag na a tumtumpaw iti Baroro river.
Babaen iti panagtitinnulong ti San Juan ken Bacnotan Police Station, Provincial ken Municipal Disaster Risk Reduction Management Council a nangisayangkat ti retrieval operation, nakita da iti bagi ni Lionin a tumtumpaw iti karayan a sakop ti Barangay Sto. Rosario, San Juan.
Dagus da nga inturong ti biktima idiay Bacnotan District Hospital ngem naideklara a dead on arrival.
Nainget ita iti isayangkat nga imbestigasyon dagiti otoridad tapno maamwan ti pudno a makagapo iti pannakalmes ken pannakatay iti biktima.
