LA UNION – Naipasidongen ti inquest proceedings ken sumangsango iti kaso a panaglabsing iti RA 9165 wenno Comprehensive on Dangerous Drugs Act, illegal possession of ammunition and explosives, ken carnappingang ti 4 a carnappers nga immuna a natiliw idiay Barangay Camp 1 idiay ili ti Rosario, La Union.
Daytoy ti kinuna ni Police Insp. Jesusa Pajarillo, deputy chief of police ti Rosario Police Station iti pannakiuman ti Bombo Radyo La Union.
Segun pay kenni Pajarillo, agtultuloy iti naun-uneg nga imbestigasyonda no sadino maibasar iti panagsukimatda ket kabilang dagiti suspek iti dakkel a grupo nga agop-operate idiay Bataan, Calabarzon, Cavite ken dadduma pay.
Kabayatan na, al-allukoyen met dagiti otoridad dagiti nagbalin a biktima dagiti suspek nga agturong iti kuerpo ti pulisya ken mangidatag ti naan-anay a kaso kontra kadagiti akusado.
Maipalagip, nakimmeg dagiti suspek nga isuda Orlando Hernandez Jr., tubo ti Sison, Pangasinan ken agnanaed idiay Dasmarinas, Cavite; Albert Hipolito ti Tandang Sora, Quezon City; Edwin Trinidad ti Lamesa Street, Valenzuela City; ken John Paul Tolentino ti Talipapa, Quezon City gapu iti panangiyukom ti biktima a ni Alvin Macalam ti Tanza, Cavite kadagiti tauhan ti Rosario Police Station ken Highway Patrol Group (HPG).
Maibasar iti panangiyistroya ni Macalam kenni S/Supt. Rocardo Layug Jr., provincial director ti La Union Police Provincial Office (LUPPO), July 26, 2018 idi rinentaan dagiti suspek ti Toyota Innova na ngem saanen daytoy nga naisubli kenkuana iti napagtulagan nga aldaw.
Malaksid iti pannakarekobre iti natakaw a lugan nga inusar dagiti suspek ket nakompiskar pay manipud kadakuda ti lima nga sachet iti mapagatapan a marijuana, lima nga pidaso ti bala para iti cal .45 a paltog, maysa nga granada, ken nadumaduma pay a klase ti bogus nga identification cards.
