LA UNION – Nagbanag iti engkwentro ti naisayangkat a panangaresto dagiti pulis iti maysa a security guard a karaman iti listaan dagiti wanted person gapu ti kaso a murder idiay Barangay Magsiping, ili ti Luna, La Union.
Nabigbig ti akusado ken napapatay a sekyu a ni Nestle Jampas a tubo iti probinsya ti Leyte, ken agnanaed ita iti nasao nga ili.
Iti pannakiuman ti Bombo Radyo kenni C/Ins. Silverio Ordinado Jr., information officer ti La Union Police Provincial Office (LUPPO), kinunana a kalpasan a matiliw iti tauhan ti Luna Police ket dagus a pinusasanda ti akusado ken inluganda daytoy iti patrol car tapno iturong iti kwerpo ti pulisya.
Kabayatan nga agan-andar ti lugan iti pulisya ket immagaw iti igam ni Jampas ken naggandat a naglibas kasaruno iti panangpaltogna kadagiti pulis.
Bimmales met dagiti pannakabagi ti linteg ken natirwanda ti akusado.
Naiturong pay idiay Balaoan District Hospital ni Jampas ngem nauyos met laeng ti biagna.
Sigun pay kenni Ordinado, kabayatan a mangisaysayangkat iti post mortem examination dagiti police investigators ket nakaalada iti maysa a sachet a naglaon iti maatap a marijuana.
Naammuan a ni Jampas ket agar-aramat ti alyas Nesloy Jampas ken nakaserrek daytoy kas gwardiya iti maysa a security agency a nakabase idiay syudad ti San Fernando, La Union.
Agarup tallo a tawen met a naglemmeng idiay probinsya ti akusado ken nagkipagnaed daytoy iti kabagyanna.
Ni Jampas ket addaan iti warrant of arrest manipud iti sala ni Caloocan City, Regional Trial Court (RTC) Branch 129 Judge Thelma Canlas Trinidad-Pe Aguire gapu iti kaso a murder, ken naiyatnag daytoy idi September 29, 2015.
Isuna ti matudtudo nga akusado iti pammapatay kenni Dustin Celeda ti Caloocan City idi January 18, 2015. (Absalom Flores)
