LA UNION – Umaap-apela ni dati a kagawad Victorio Ducusin iti konseho ti Barangay Pao Sur, San Fernando City, La Union a maited koman ti honorarium-na a nagserbi kas opisyal ti nasao a lugar.
Iti pannakiuman ti Bombo Radyo kenni Ducusin, kinunana a ginastus ken saan nga inted kenkuana ni Barangay Treasurer Noli Duclayan ti kwartana a nagserbi kas kagawad idi ti barangay.
Sigun kenni Ducusin, immunan a nagsiddaw daytoy gapu ta isuna laeng ti saan a nakaawat idi ti honorarium.
Naammuanna laengen a nagastos ti treasurer ti kwartana.
Kabayatanna, kinuna met ni Punong Barangay Jessy Pacio nga ammona ti parikot ni Ducusin ken nakasao na metten ti agdama a treasurer.
Panggep a pagsangnguen ti Pacio dagiti dua tapno marisot iti nasao a problema.
Maipagarup nga adu pay ti sangsanguen a problema ti treasurer gapu kadagiti saan a mailawlawag a nagastos iti napalabas nga administrasyon ti nasao a barangay a naduktalan ti Commision on Audit.
