LA UNION – Natay iti maysa a tricycle driver kalpasan a madungpar ti Partas bus iti minaneho na a traysikel, iti kawatiwatan ti national highway idiay Barangay Subusob, Rosario, La Union.
Indeklara ti doktor idiay Rosario District Hospital a dead-on-arrival iti biktima a ni Bailey Quirijeno, 46, addaan asawa, residente ti nasao met laeng a lugar gaputi sinagaba daytoy a nakaru a pannakadangran iti bagi kalpasan ti aksidente.
Nadundunor met iti pasahero daytoy a nabigbig a ni Teresita Lucero, 55-anyos.
Base iti initial report ti Rosario Police Station, dagiti dua a behikulo ket agpada nga agturong iti amianan a direksiyon, idi kellaat a madungpar ti traysikel babaen iti sumarsaruno a partas bus.
Agpada a nagpasar iti pannakadadael dagiti behikulo, kangrunaan na iti traysikel.
Kabayatanna, iti respondent driver ti Partas bus a nabigbig a ni Bernard Supnet Jr. 27-anyos, baro, ken tubo ti Barangay Cosocos, Nagbukel, Ilocos Sur ket sumangsango ita iti maiyannatop a kaso.
