- LA UNION – Saan nga nakalisi iti rungsot iti pagilian a HongKong kalpasan a simmaruno nga dinuprak ti bagyo Ompong manipud iti Pilipinas.
Iti pannakiuman ti Bombo Radyo La Union kenni Mel Nitura, taga Barangay Sucoc Norte, Luna, La Union ken nabayagen nga agpapaay kas domestic helper idiay Hongkong, kinuna na a”monster” iti pangiyarigan ti kaaduan iti panagduprak ti bagyo Ompong iti pagilianda.
Kinuna na, saanda nga ninamnama iti kinapigsa daytoy no sadino ket naipasidong pay daytoy iti signal # 10 a nangdadael iti adu nga istruktura, nangpasardeng iti transportasyon, nanglayos iti kaaduan a kalsada, panagsaplit ti agkakapigsa nga dalluyon ken inyanod na pay ti dadduma a lugan gapu iti sobra a kinapigsa ti tudo ken angin nga tugot ti bagyo.
Segun pay kenkuana, saybay a dimmuprak idiay HongKong ti typhoon Mangkhut ken nagpanic buying iti kaaduan no sadino sumagmamano kadagiti negosyante iti nangundaway a nangipangato ti presyo kadagiti gagatangen.
Kinuna na pay, iti kinabayagnan nga agserserbi idiay HongKong, daytoyen iti kapigsaan nga bagyo a timmama iti nasao a pagilian.
Kabayatan na, manamnama a sumayaaten ti panawen ita nga aldaw iti nasao a pagilian agsipudta saan nga agpaot iti maysa nga aldaw no dumuprak ti maysa a bagyo sadiay segun kenni Nitura.
