LA UNION – Maysa manen a lalaki ti nakumpiskaran iti marijuana kabayatan ti panagresponde dagiti otoridad iti reklamo a pananggandatna nga agtakaw iti uneg ti nakaparada a truck iti Diversion Road, Brgy. Biday, ditoy siudad ti San Fernando.
Nabigbig daytoy a ni Jeff Ryan Casugay, 20-anyos, residente ti Brgy. Tanqui.
Immuna iti daytoy, nakaawat iti impormasion ti San Fernando City Police Office ket idi nakagtengda iti nasao a lugar, naaktuanda ti pananglukat ni Casugay iti ridaw ti nakaparada a truck.
Ginandatna ti naglibas ngem natiliw met laeng ken nakumpiskar pay kenkuana ti dua a sachet ti napagango a bulong ti marijuana.
Sumangsango met itan iti agtutuon a kaso ni Casugay ken adda iti ikut ti pulisia para iti umisu a disposision.
