LA UNION – Kinondinar ken inawagan a “barbaric act” ni La Union Governor Francisco Emmanuel “Pacoy” Ortega III, dagiti mapas-pasamak ita a krimen ditoy probinsiya.
Iti press statement na, nangipeksa ti liday ken simpatiya ni Gov. Ortega iti napasamak a pammapatay kenni Sudipen Mayor Alexander “Alan” Boquing, a nakairamanan iti bodyguard na a ni PO2 Rolando Juanbe ken driver daytoy a ni Boni Depdepen.
Iti laeng nakalasat iti napasamak nga ambush idi rabii ti Lunes, October 1, 2018 ket ti asawa na a ni Vice Mayor Wendy Joy Boquing.
Kas chairman iti Provincial Peace and Order Council, dinutukan ti gobernador ni PSSupt. Ricardo Layug Jr. a mangidadaulo iti La Union Police Provincial Office (LUPPO) nga aramiden ti amin a rumbeng a wagas tapno pagsungbaten iti siasinuman nga adda iti likod ti krimen.
Gaputi dayta, dagus a nabukel iti “Special Intelligence Task Group (SITG) Boquing” a mangtutok iti napaspas a panangresolba iti napasamak a krimen.
Makikaykaysa met ni Gov. Ortega iti amin nga agbalin a vigilante tapno saanen a maulit iti napasamak a krimen.
Siniguro na pay iti commitment ti Provincial Government of La Union (PGLU) iti panangitandudo iti probinsiya kas maysa a nakapya, naurnos ken natalged a lugar.
