LA UNION – Agtultuloy iti imbestigasyon dagiti otoridad seknan iti napasamak nga uram iti Tanglag National High School idiay Brgy. Tanglag, Rosario, La Union idi agsapa ti Domingo.
Nagresulta daytoy iti pannaka-dapo iti dua a silid pagadalan, partikular iti Technology and Livelihood Education (TLE) room a mapapati a nagtaudan ti apoy, ken iti PTA Classroom.
Iti pannakiuman ti Bombo Radyo La Union kenni SFO3 Nestor Libunao, Municipal Fire Marshal ti Rosario Fire Station, kinuna na a napasamak ti uram agarop alas 7:00 ti agsapa idi Domingo, Disyembre 20, ken naideklara a fire out iti oras ti alas 9:00 ti agsapa.
Dimmanon iti maikadwa nga alarma ti napasamak nga uram.
Segun pay kenni Libunao, maysa a residente a magmagna iti maipagarop a nakakita iti timpuar nga uram.
Dagus met a nagresponde dagiti bumbero manipud Rosario Fire Station ken Sto. Tomas Fire Station kalpasan a naawat da iti impormasyon.
Saan pay nga ammo iti pakabuklan a danyos dagiti dimmapo a libro, arwaten iti panagluto ken sumagmamano nga appliances kadagiti nasao a kuwarto.
