LA UNION – Rinugyanen ti Philippine Statistics Authority, PSA-Region 1, nga ipatulod iti National ID kadagiti immun-una a nagparehistro.
Naamwan ti Bombo Radyo La Union manipud PSA Region-1 a sumagmamano metten a residente ditoy La Union nga immuna a nagparehistro, iti nakaawaten ti nasao nga identification card babaen iti koreo.
Kabayatanna, umaboten iti 740, 424 nga indibidwal iti intero nga Ilocos Region iti nalpasen a nagparehistro para iti Step 2 iti agtultuloy a National ID Registration.
Manipud iti nasao a bilang, 235,791 nga indibidwal ket manipud ditoy probinsiya ti La Union.
Kaibatugan daytoy iti 70-80% a pakabuklan a registrants ditoy probinsiya.
Agtultuloy ti panangpalagip iti PSA Region 1 kadagiti registrants a suruten iti naituding nga schedule dagitoy iti barangay tapno maliklikan ti panagdudupudup kadagiti fix registration centers iti bukod dagitoy nga ili.
