LA UNION – Naikkat iti pwesto iti hepe ti Porac Police Station idiay Pampanga bayat ti imbestigasyon iti maipagarop nga scam farm iti uneg ti maysa a Philippine Offshore Gaming Operator (POGO) hub a na-raid ita a lawas.
Segun kenni Philippine National Police (PNP) spokesperson Police Colonel Jean Fajardo, daytoy ket tapno ipaayan dalan iti imbestigasyon dagiti otoridad nu kasatnu a nakalusot iti pwersa dagiti otoridad iti ilegal nga operasyon ti nasao a POGO hub idiay ili ti Porac.
Saan metten nga imbutaktak pay ni Col. Fajardo iti nagan ti naikkat a hepe ti Porac Municipal Police Station.
Malaksid dayta, imbestigaran pay ti PNP iti lokal a gobyerno idiay Porac agsipudta impalubos na nga ag-operate iti POGO hub laksid nga awanan daytoy ti permit sipud pay idi 2023.
Maipalagip nga idi aldaw ti Martes, inserbi dagiti otoridad iti search warrant kontra POGO hub, maibasar iti reklamo seknan iti maipagarop a mapaspasamak a human trafficking iti uneg ti 10 nga ektarya a pasdek.
Naipadamag pay a mairam-raman ti nasao a POGO hub iti adu a criminal activities kabilang iti human trafficking, sex trafficking, torture, kidnapping, ken scamming.
Naisalbar iti nasao nga operasyon iti pakabuklan a 158 a gangannaet a kaadwan ket Chinese national idinto a nakalibas dagiti dadduma nga indibdwal nga adda iti uneg ti POGO hub kalpasan a matiktikan ti naisayangkat a raid.
