Mangited ti Presidential Anti-Organized Crime Commission (PAOCC) ti maysa a milyon a pisos a reward ti siasinoman a makaipaay ti impormasyon a mausar para ti panangsukimat ti pagnanaedan ti sigud a Police Lieutenant Colonel a ni Rafael Dumlao III.
Ni Rafael ti maitudtudo a mastermind iti panangkidnap ken panangpapatay iti negosyante a Koreano a ni Jee Ick-joo.
Segun kenni Criminal Investigation and Detection Group (CIDG) Director Police Major General Nicolas Torre III, addaan dan kadagiti leads a sursuruten ti hanay nu sadino ti paglemlemmengan ti suspek.
Kinunana ket nakadanon iti ahensya da iti impormasyon ken traces dagiti dua nga assawa na a mabalin a pagrugrugianan ti tracking team para ti panagsukimat kadaitoy.
Idi laeng aldaw ti Dominggo ket imbilin mismo ni Executive Secretary Lucas Bersamin ti panangiyuswat ti manhunt operations kontra ti pannakaarestar ni Dumlao.
Impaganetget met ni Torre nga awan pay ti records ti Bureau of Immigration (BI) nga official departure babaen ti nagan a Rafael Dumlao III, nupay kasta, saan da met ik-ikkaten ti posibilidad a mabalin a nakalibasen ditoy pagilian ti suspek.
Impasiguro met ti PNP nga agtultuloy ti koordinasyon da iti International Police Organization (Interpol) para ti Red Notice kenni Dumlao a maaramat met a pang-alerto kadagiti sabali a pagilian.
