Nangipila ni Duterte Youth chairperson Ronald Cardema ti reklamo sadiay Office of the Ombudsman kontra kadagiti sumagmamano nga opisyales ti Commission on Elections (Comelec) mainaig ti pannakasuspindir ti proklamasyon dagiti party-list nominees da.
Segun iti reklamo, mailabsing ti linteg ti nagbalin a rekomendasyon dagiti sumagmamano nga Comelec officials nga itantan ti proklamasyon ti Duterte Youth, ken daitoy ket nalawag a panangabuso ti bileg.
Kinuna pay ni Cardema nga awan iti Comelec Resolution No. 11140 ti bileg ti Supervisory Committee tapno irekomendar ti suspensyon a mapapati a naglabsing ti Anti-Graft and Corrupt Practices Act.
Dinakamat ti Duterte Youth a ti pannakaitantan ti proklamasyon ket nakadadael ti nasurok 2.3-M a Pilipino a nagbotos kadakuada.
Karaman kadagiti mairekreklamo ket isuda Comelec Executive Director Teopisto Elnas Jr., Deputy Executive Directors Rafael Olaño, ken Helen Aguila-Flores, karaman pay dagiti sumagmamano a staff manipud ti Election Records and Statistics Department.
Malaksid ti reklamo idiay Ombudsman, kiniddaw pay ti Duterte Youth sadiay Commission on Appointments a lapdan ti kumpirmasyon dagiti dua a Comelec Commissioners nga isuda Noli Pipo ken Norina Casingal a nagperma ti resolusyon a mangitantantan ti proklamasyon.
Kabayatanna, pinaglibakan met ti Comelec dagiti pammabasol. Segun kenni Comelec spokesperson Rex Laudiangco, addaan ti umdas a bileg ti commissioner nga agperma ken saan a maibilang daitoy kas “grave abuse of discretion.”
Ti naggiddan a panag-apela ti Duterte Youth sadiay Korte Suprema ken Commission on Appointments ket maibilang pay kas forum shopping.
