Inwaragawag ti Malacañang a saan a diktador ni Presidente Ferdinand Marcos Jr. tapno diktaran ti agbalin a desisyon mainaig ti legislated wage hike.
Daitoy ti sungbat ti Palasyo ti impeksa dagiti sumagmamano a progresibo a grupo a nu pagayatan ti Presidente ket mabalin na met nga ipatungpal ti kanayunan a sahod babaen laeng ti pammilin ti Malacañang.
Ti sabali a bangir, inlawlawag ni Palace Press Officer Claire Castro a saan a kumontra ti Presidente iti wage hike nangruna ta pagnumaran met daitoy dagiti mangmangged.
Nupay kasta, rumbeng latta a masurot iti proseso, pakairamanan ti panagadal ti Regional Tripartite Wages and Productivity Board ti sueldo ti tunggal rehiyon.
Kabayatanna, tinawen met nga ireprepaso ti Board ti kasasaad ti ekonomiya kadagiti lokalidad tapno madakamat nu adda ti umdas a basaran ti panagngato ti sueldo.
