Natalged a nakaballasiw iti pagilian a Jordan dagiti 21 nga opisyales ti Pilipinas a na-stranded idiay Israel iti kangitingitan ti kumarkaro a gyera da iti Iran, segun iti Department of Foreign Affairs (DFA) ita a Huwebes.
Manipud iti nasao a bilang ket 17 ti dimmar-ay para ti training iti agricultural technology manipud Hunyo 10 agingga Hunyo 20. Karaman kadagitoy dagiti dua a kongresista, siyam nga Mayor, uppat a Bise Mayor, dua a regional directors, ken uppat nga espesyalista ti dairy industry manipud ti Department of Agriculture.
Segun iti DFA, aktibo a nakikokoordinar iti Philippine Embassy idiay Tel Aviv iti embahada ti Pilipinas idiay Jordan ken kadagiti otoridad tapno maipatungpal ti panagballasiw dagiti opisyales.
Sinarungkar ida ni Philippine Ambassador Wilfredo Santos idiay King Hussein Border ken naikkan ida ti tulong, pakairamanan ti transit visa nga awan ti gastos manipud iti gobierno.
Namnamaen ti DFA a kadagiti sumaganad nga aldaw ket maawat dagiti umuna a batch dagiti Overseas Filipino Workers ti embahada idiay Jordan kas paset paylaeng ti evacuation efforts.
