Agtultuloy ti panangisayangkat ti imbestigasyon ken beripikasyon ti Philippine National Police (PNP) mainaig ti posibilidad a saan laeng a Taal Lake ti mabalin a nangibellengan ken nakaipunponan dagiti bangkay ti nasurok sangagasot a mapukpukaw a mammallot.
Segun kenni PNP Chief Police General Nicolas Torre III, maipasidong pay ti beripikasyon ti impormasyon nga adda dagiti dadduma a bangkay nga inuram bayat a dagiti dadduma met ket naikali iti daga.
Innayon na pay a mabalin a saan laeng a sadiay Taal Lake ti disposal site ken adda dagiti makitkita da a partikular a lugar a nakaibellengan dagiti bangkay.
Nagkedked met ti hepe a dakamaten dagiti nasao a lugar nga isaysayangkatan da ti beripikasyon tapno masiguro a saan a mapurnada ti imbestigasyon kasta met nga addaan ta ti umdas nga ebidensya a mangpaneknek kadagiti rebelasyon ni alias ‘Totoy’.
Dakkel met iti posibilidad ti kaadda dagiti personalidad a maapektaran iti imbestigasyon da a mabalin a rason ti pannakagun-od ti impormasyon.
Nupay aminado ti hepe nga agbalin a narigat ti panagbirok da kadagiti bangkay dagiti mapukpukaw a mammallot ngem impasiguro na met nga aramiden ti kapulisan ti kabaelan da nga agtennag iti linteg kasta met a mapagsungbat dagiti amin a karaman iti krimen.
