Nangipadanon ti pannakiladingit ti Overseas Workers Welfare Administration (OWWA) iti pamilya, gagayyem, ken pada nga Overseas Filipino worker (OFW) ni Leah Mosquera, iti Filipina caregiver idiay Israel a pimmusay gapo iti panagraut ti Iran idiay Israel.
Segun iti OWWA, ipaay da ti tulong kadagiti miembro ti pamilya ni Leah kasta met iti panag-asikaso ti madagdagos a panangpaawid kenkuana.
Ni Leah ket karaman kadagiti biktima idiay Rehovot, Israel idi Hunyo 15 kalpasan a matirwan ti missile ti pagnanaedan da a flat.
Adda isuna iti kritikal a kondisyon kabayatan ti kaadda na ti ospital ngem pimmusay metlaeng, kas pinasingkedan ti kabsat na a ni Mae Joy, maysa metlaeng nga OFW idiay Israel.
Nakatuding na kuma a selebraran ti maika-50th a kasangay na inton Hulyo 29.
