Dumanon ti nasurok P11M a gatad ti perdisyon kadagiti korales ti parachute anchor nga inabandona ti Chinese maritime militia (CMM) vessel asideg ti Pag-asa Island idi Hunyo 7, segun iti Pilipino a siyentista a nangisayangkat ti environmental assessment ti nasao a lugar.
Pakaseknan met dagiti otoridad a mabalin a mangigubuay pay daitoy ti ad-adu a perdisyon, malaksid nu ma-retrieve iti parachute anchor iti kadarasan a panawen.
Segun iti biologist a ni Mark dela Cruz, nakakita da iti indikasyon ti persiyon kas iti narumek a fragments dagiti sanga ti korales ken piraso ti ad-adu pay a dadakkel a korales ken bahura.
Immuna metten a pinasingkedan ti Palawan Council for Sustainable Development (PCSD) a kabayatan ti panaglayag ti CMM vessel ket simmadsad daitoy iti uneg ti tallo nga oras idi Hunyo 7. Nasurok dua a kilometro ti kaadayu na manipud idiay Pag-asa Island sakbay a naaramidan na a makapanaw iti pannakasadsad. Kabayatan ti panagpanaw na ket adda latta a nakasurot ti China Coast Guard ken dua pay a barko iti China.
Nupay saan a direkta a nakaapektar ti panagsadsad na kadagiti coral reefs, kinuna ni habitat management section chief kay Dela Cruz a ti naabandona a parachute anchor ti Chinese fishing vessel iti seabed nga addaan ti siyam a metro ti kauneg na ket nakadadael iti 464.96 square meters kadagiti coral reefs.
Ti coral reefs ket aggatad ti P12K per square meter bayat a kanayunan manen a P12K ti kasapulan per square meter tapno mapabiag dagitoy. Inrekomendar ti konseho ti panagkolekta ti multa iti Chinese vessel babaen ti Philippine Fisheries Code of 1998 ken Wildlife Resource Conservation and Protection Act.
