Nangisayangkat ti Philippine Coast Guard (PCG) ken Armed Forces of the Philippines (AFP) ti search and rescue operations kadagiti nagduduma a paset ti pagilian iti kangitingitan ti madi a kasaasad iti paniempo.
Nangrugi nga iyuswat ti PCG ti operasyon da idi pay aldaw ti Huebes ken dimmanon ti agingga 6,761 ti nabakwit ken naispal da.
Karaman iti daitoy ket ti panagresponde ti Coast Guard District Bicol ti maysa a barge a naiyanod ken naisadsad iti kosta ti Catanduanes gapo iti kinapigsa ti alon nga inggubuay ti Habagat.
Mainaig iti daitoy ket awan met iti indikasyon ti timmagas a langis wenno polusyon iti naisadsad a barge bayat a kummiddaw met dagiti tallo a tripulante a sakay na nga isuda ket maisalakan.
Kabayatanna, naispal met ti CG District Southern Visayas dagiti 151 a residente a nalayus kadagiti Barangay 1, 2, ken maysa a karayan idiay Negros Occidental. Mainayon iti dayta ket ti naispal dagiti kameng ti CG Sub-Station Peñablanca Deployable Response Group (DRG) a residente nga agnanaed asideg ti Pinacanauan River idiay Cagayan gapo ti kellat a panagngato ti danom iti nasao a karayan.
Idiay probinsya ti Palawan, 253 a residente ti nabakwit kasaruno a nalayus iti babbalay da.
Kabayatanna, nagpatulod met ti Philippine Army iti humanitarian assistance and disaster response teams da ditoy Northern Luzon tapno mangisayangkat ti search and rescue missions iti kangitingitan ti panagduprak ti Bagyong Crising ken Habagat.
