Impadamag ti Office of the Civil Defense (OCD) nga adda dagiti tallo nga indibidwal ti agtaltalinaed a mapukpukaw gapo paylaeng iti panagduprak ti Bagyong Crising ken Southwest Monsoon ditoy pagilian.
Segun kenni OCD Administrator Rafaelito Alejandro IV, dua nga indibidwal a naipadamag a mapukpukaw ket manipud Antique. Naiyanod dagitoy agturong iti baybay kabayatan a matmaturog iti pagtaengan da idi kellat a ngimmato ti danum gapo iti sumagmamano nga aldaw a panagtudo.
Kabayatanna, ti met maysa a naipadamag a mapukpukaw manipud Palawan ket maudi a nasaripatpatan a nagturong iti igid ti baybay ken agingga ita ket tarigagay a mabiruk dagiti otoridad.
Maibasar iti monitoring ti ahensiya, dumanonen ti agingga 215,000 a tattao manipud 495 a barangay ti apektado ti dakes a kasaad ti paniempo ken kaadwan kadagitoy ket manipud idiay Negros Island Region ken Panay.
