Inwaragawag ti opisina ni Israeli Prime Minister Benjamin Netanyahu a nabiktima isuna iti food poisoning ken nakapadas iti intestinal inflammation kasta met iti dehydration a dagos metlaeng a naagasan.
Kabayatanna, maisayangkat met ti 3-hour closed-door hearing ni Netanyahu iti maysa a Korte ita nga aldaw ti Lunes, manipud alas-dos agingga alas-singko ti malem (oras ditoy Pilipinas) mainaig kadagit sangsangwen na a kaso-kriminal.
Paset ti nasao a panagdengngeg ti cross-examination phase nga obligado a dar-ayan ni Netanyahu iti korte, mamindua iti makalawas.
Daitoy a maisayangkat a closed-door hearing ket tapno masalakniban ti seguridad ti pagilian agsipud ta madakamat dagiti sumagmamano a sensitibo nga operasyon ti Israel.
Maipalagip a sumagmamano a daras a nakanselar iti panagtataripnong kadagiti napalabas a lawas gapo iti tensiyon idiay Iran ken kadagiti diplomatiko a panagbiahe iti Prime Minister idiay Estados Unidos.
Dumanon ti agingga sangaribo a kaso ti madama nga ipapamaysa iti prosekusyon a nagtaud amin kadagiti nagan da Netanyahu ken ti Hollywood billionaire a ni Arnon Milchan.
Maak-akusaran ni Netanyahu iti ‘favoritism’ babaen ti panangitandudo na iti linteg a pumabor kenni Milchan bayat a makaaw-awat kadagiti nagkakangina a regalo kas iti premium cigarette ken champagne manipud iti bilyonaryo.
