Saan a bumaba iti tallo nga indibidwal ti pimmusay bayat a dinosena met a turista ti na-stranded kasaruno ti kellaat a cloudburst nga inggubuay ti agtultuloy a panagtudo idiay Babusar Road, Gilgit-Baltistan, Pakistan.
Segun iti Diamer district administration, tallo a bangkay iti naiturong idiay Regional Headquarters Hospital (RHQ) ayanti Chilas bayat a maysa met iti kumpirmado a madama nga maag-agasan.
Napasamak ti insidente ti nagbaetan dagiti ili ti Jal ken Diyung a mano nga aldawen iti panagtudo ken nailista iti panagreggaay iti daga a 7 agingga 8 kilometro a paset ti kalsada.
Napartak a nangisayangkat ti rescue operations dagiti lokal nga otoridad tapno maispal dagiti na-stranded a turista. Naisakay dagitoy manipud Girls’ Degree College ken naiturong ti maysa a hotel idiay Chilas para ti temporario a pagnaedan da.
Personal met a binisita ti Deputy Commissioner ken Superintendent of Police ti Diamer iti lugar.
Kabayatanna, agtaltalinaed latta a nakaserra iti Babusar Road kasta met dagiti sumagmamano a paset ti Karakoram Highway (KKH) idiay Lal Parhi ken Tatha Pani nga addaan iti 10–15 a lugan iti naipit iti panagreggaay iti daga ken inyanod iti karayan.
