Pabpabasolen ti Iran dagiti pagilian ti Europa mainaig iti pannakatantan ti 2015 Iran nuclear deal, sumagmamano nga aldaw sakbay iti nakatuding a panagtataripnong idiay Istanbul kadwa iti Britain, France, ken Germany.
Segun kenni Esmaeil Baqaei, pannakangiwat ti Iranian foreign ministry, adda iti nagkurangan ti European Union (EU) ti panangipatungpal kadagiti obligasyon da.
Ti katulagan a napermaan idi tawen 2015 ket panggep a limitaran iti nuclear program ti Iran kasukat ti panangiwaswas kadagiti sanctions iti pagilian.
Karaman kadagiti nasao a pagilian ket ti Iran, Britain, China, France, Russia, Germany ken Estados Unidos.
Nupay kasta, nawaswas met daitoy idi tawen 2018 kasaruno nga immatras iti Estados Unidos babaen iti liderato ni U.S. President Donald Trump ken pinaulogan na manen kadagiti kabaroan a sanctions iti Iran.
Nupay nangipeksa iti panagsuporta iti EU, saan met pulos a nagbalin nga epektibo iti mekanismo pang-ekonomiya da nga isu kuma iti mangsarapa iti sanctions ti Estados Unidos.
Gapo iti daitoy ket adu a kompanya iti makin-Laud a pagilian ti inatrasan dan iti Iran, a nangpakaro pay iti krisis ti ekonomiya da.
Kabayatanna, iti maangay met a panagtataripnong inton aldaw iti Biernes, Hulyo 25 idiay Istanbul ket manamnama a madakamat manen iti posibilidad ti panangpabiag iti nasao a katulagan
