Pinermaanen ti Games and Amusements Board (GAB) iti Resolution No. 2025-08 tapno masiguro iti kinatalged ken integridad ti plano a boxing match ti nagbaetan da PNP Chief Nicolas Torre III ken ti Acting Davao City Mayor a ni Sebastian ‘Baste’ Duterte.
Nakaperma iti papeles ket ni Atty. Francisco Rivera nga agserserbi kas chairman ken miembro iti board.
Inrekomendar ti board ti panangidutok ti maysa a kwalipikado ken accredited professional referee a mangimaton iti laban ken nabilin payen iti medical team da nga agbantay tapno dagos a makaipaay iti atensyon-medikal.
Panggep iti resolusyon a masiguro a nasayaat ken natalged ti pannakaisayangkat ti boxing match, kas maiyannurot iti standards ti professional sports.
Ipakpakita iti Games and Amusements Board ti kinapateg iti regulasyon kadagiti pampubliko a pasamak nga adda pakainaigan na iti nasao a banag.
Kabayatanna, awan pay met iti nakatuding a petsa ti laban ngem aktibo iti panagsagana da tapno masiguro iti nasayaat a pagtungpalan ti agsinnumbangir a partido.
