Inyanunsyo ti Department of Labor and Employment (DOLE) a dagiti empleyado a simrek iti trabaho para ti Hulyo 27, 2025 ket makaawat ti kanayunan a 30% a maibasar para ti umuna a walo nga oras a panagtrabaho da.
Maiyannurot daitoy iti Labor Advisory No. 09, Series of 2025, seknan iti deklarasyon kas special non-working day ti intero a pagilian ti anibersaryo ti Iglesia Ni Cristo a maibasar met iti Proclamation No. 729 ni Presidente Ferdinand Marcos Junior.
Segun iti DOLE, epektibo iti “No work, no pay” para kadagiti empleyado a saan a simrek, malaksid nu adda iti katulagan iti kompanya wenno collective bargaining agreement.
Kabayatanna, 130% met ti masueldo dagiti empleyado a simrek para ti umuna a walo nga oras a panagtrabaho da. Maikkan pay iti kanayunan nga overtime hourly rate a 30% kas maibasar metten iti naituding a formula.
Nu iti nasao nga aldaw ket naibatug a rest day wenno dayoff, ti sueldo a nasken a maala ti maysa nga empleyado ket 150% a regular ti daily rate na.
Para met iti overtime iti rest day ken special day, ket manayunan manen iti 30% iti hourly rate.
Imballaag ti DOLE kadagiti employers a suroten ti umiso nga allagaden para iti empleyado da iti naituding a special holiday.
