Saan a dimmar-ay ti maikauppat a State of the Nation Address (SONA) ni Presidente Ferdinand Marcos Junior dagiti sumagmamano a senador a kaalyado ni sigud a Presidente Rodrigo Duterte.
Immun-una kadakuadan ket ti mismo a manang na a ni Senadora Imee Marcos, kasta met da Senador Ronald dela Rosa, Bong Go ken Robin Padilla.
Kinuna ni Senadora Marcos a ti desisyon na ket nakabase iti panagsali na iti grupo dagiti Duterte nu sadino ket adda dagiti sumagmamanon a senador ti saan a dimmar-ay idi pay napalabas a SONA.
Innayon na nga adda pay dagiti napatpateg a dinar-ayan na ken iti SONA ket mabalin na met a mangngegan ti replay na kadagiti radyo, mabasa kadagiti diyaryo, wenno mabuya iti telebisyon.
Kabayatanna, kinuna met ni Senador Go a nakapadas daitoy iti back spasm isu a kinasapulan na iti agpakita iti doktor bayat a ni Senador dela Rosa met ket direkta a kinuna a saan na kayat nga agpammarang ken agbalin a “plastic” iti desisiyon ti gobierno a makibinnulig iti International Criminal Court ken ipaarestar ni sigud a Presidente Rodrigo Duterte.
Iti sabali a bangir, dimmar-ay met iti SONA dagiti sumagmamano nga kaalyado ni Duterte kas isuda Senador Rodante Marcoleta, Mark Villar, ken Camille Villar.
