Inwaragawag ni Presidente Ferdinand Marcos a napaneknekanen a kabaelan ti pagilian ti panangilako iti bente pesos a bigas a saan a maluglugi dagiti mannalon.
Daitoy ti kinuna iti maikauppat a State of the Nation Address wenno SONA idi kalman, Hulyo 28, 2025.
Innayon na pay a nairanta ti P113-B a pondo para ti panangpapigsa kadagiti programa ti Department of Agriculture ditoy intero a pagilian babaen ti panangpaado pay kadagiti Kadiwa ng Pangulo stores.
Kabayatanna, nagpakdaar met it Presidente kadagiti negosyante a managgundaway ti presyo ken awan-asi a mangab-abuso kadagiti mannalon.
Segun kenni Presidente Marcos, kamaten ken pagsungbaten ti gobierno dagitoy a kriminal agsipud ta iti ar-aramiden da ket maibilang nga economic sabotage wenno panangsabotahe iti ekonomiya.
Iti sabali a bangir, innayon ti presidente nga addaanen iti gobierno ti solusyon iti panangtaming ti agtultuloy a panagngato ti presyo iti baboy.
Kinunana a kasapulan a mapangato iti lokal a produksyon babaen ti panangipaay kadagiti libre a burias ken inahin, panangipasdek kadagiti bio-secured facilities, ken tapno naan-anayen a mapababa iti presyo ti baboy ket nangrugin iti panagbakuna kontra ASF kasta met a mapalawa pay daitoy iti intero a pagilian.
