Imbatad ni Presidente Ferdinand Marcos Junior a mangrugi iti Hulyo 28 wenno aldaw iti Lunes ket libren a mausar ti publiko dagiti track and field ovals ti Philippine Sports Commission (PSC) idiay Pasig, Maynila, ken Baguio City.
Panggep daitoy nga addang a sungbatan ti agtultuloy a panagngato ti timbang dagiti Pilipino a 20-anyos agpangato, kas maibasar iti panagadal.
Malaksid daitoy ket impasiguro na pay ti sibubukel a suporta ti gobierno kadagiti Pilipino nga atleta. Dinakamat na dagiti paay-ayam kas iti Palarong Pambansa ken Batang Pinoy Games a maangay ita a tawen idiay General Santos City inton bulan ti Oktubre.
Innayon na pay a mangrugin a maiyuswat ti maysa a National Program for Sports Development a nakapamaysa kadagiti pagadalan.
Kabayatanna, naangaw met a pinadayawan ni Presidente Marcos Junior ni Philippine National Police (PNP) Chief Police General Nicolas Torre III iti panangpabida na kadagiti achievements ti Pilipinas iti tay-ak ti Sports; kinunana nga isali na metten iti Hepe kas baro a kampeon mainaig paylaeng iti pannakadeklara na kas “winner by default” iti charity boxing match da ni Acting Davao City Mayor Sebastian “Baste” Duterte.
