Impasiguro ti Department of Health (DOH) nga awanen iti bayadan dagiti pasiente para ti basic accommodations kadagiti hospital ti ahensya.
Daitoy ket maiyannurot ti direktiba ni Presidente Ferdinand Marcos Junior iti maikauppat a State of the Nation Address (SONA) na idi aldaw ti Lunes, Hulyo 28, 2025.
Inyanusnsyo ti Presidente iti SONA na a maipatungpalen ti zero-balance billing tapno makissayan dagiti problema pinansyal dagiti pasyente nga agkasapulan ti medikal a pannakataming.
Innayon na pay iti panagbetla na a libre itan ti serbisyo dagiti basic accommodation kadagiti ospital ti DOH isu nga awanen ti problemaen pay a bayadan dagiti pasyente.
Ti tulong medikal ket napondoan babaen ti Medical Assistance to Indigent and Financially Incapacitated Patients (MAIFP), Philippine Charity Sweepstakes Office (PCSO), Philippine Amusement and Gaming Corp. (Pagcor), ken alokasyon ti iti DOH, malaksid pay daitoy iti kanayunan a suporta pinansiyal manipud met iti Philippine Health Insurance Corporation (PhilHealth).
Iti maysa a waragawag, pinasingkedan ti DOH a karaman kadagiti kanayunan a tulong ket ti pagbayad para kadagiti hospital bills dagiti pasyente, karaman ditan ti e-Gov application iti panagproseso ti Medical Assistance to Indigent and Financially Incapacitated Patients (MAIFP) program.
Dagiti tulong medikal para kadagiti pasyente ket nagbalinen a unified, naparpartak, transparent, ken accessible kadagiti kanito a kasapulan la unay.
Manipud met iti post-State of the Nation Address (SONA) forum dagiti opisyales ti ahensya ti gobyerno, inlawlawag ni Health Secretary Ted Herbosa a libre itan para iti am-amin dagiti basic accommodations basta ospital ti DOH ken saan a pangpribado nga ospital.
Segun iti sekretaryo, sakbayna ket dagiti laeng indigent wenno miembro ti 4Ps ti sakop iti zero balance billing. Impannakkel na met a 40 manipud kadagiti 83 nga ospitals ti DOH ket puro amin air-conditioned dagiti wards da.
